ما هي خطوات التسويق خطوة بخطوة؟

1- ايه الفرق بين التسويق والاعلان؟

الفرق بكل بساطة: التسويق هو البحث عن مشتري للمنتج وسوق يقدر يستقبل منتجي ويشتريه. الإعلان هو مجرد وسيلة للظهور، سواء في شكل فيديو أو صورة أو محتوى أو حتى مكالمة تليفونية، أي طريقة بتعلن بيها عن وجودك للناس هي إعلان.

الإعلان جزء أساسي من التسويق، لكنه مش هو التسويق كله. وساعات بيكون غلط إنك تسوق على السوشيال ميديا من الأساس. في عملاء بنرفض نشتغل معاهم لأن جمهورهم ببساطة مش موجود على السوشيال ميديا، فبيكونوا بيدوروا في المكان الغلط.

مثال: مستشفى بتستهدف كبار السن، أو مصنع بيتعامل مع موردين في الصين. دول جمهورهم مش متواجد أصلاً على السوشيال ميديا. عشان كده أول خطوة بنبدأ بيها هي إننا نسأل: مين هيشتري منك؟ لأن أول ما تجاوب على السؤال ده، نص الشغل بيكون خلص.

2- الخطوة الأولى: تحديد المستهدف

لو عرفت مين الزبون المستهدف، هتعرف تدور عليه وتخاطبه بالطريقة المناسبة. مثال بسيط: اشتغلنا مع شركة كبيرة في مجال صناعي، وأنجح فيديوهاتهم كانت اللي بيظهر فيها شخص شكله شعبي بيتكلم بلُغة بسيطة، لأنهم كانوا بيستهدفوا صنايعية. الفيديوهات الرسمية بالبدل والمكاتب ماعملتش 10% من التفاعل اللي حققته الفيديوهات الشعبية.

السر دايمًا في إنك تعرف بتكلم مين، وتخاطبه إزاي. الخطوة دي هي حجر الأساس لأي خطة تسويق ناجحة.

3- الخطوة الثانية: تحديد الفجوة في السوق

مهما كانت المنافسة قوية، دايمًا في فجوة في السوق. والكمال لله وحده. دورك إنك تملأ الفجوة دي — سواء كانت في السعر، أو الجودة، أو سهولة الوصول للمنتج أو الخدمة.

المنتج الحلو مش هيبيع نفسه لو محدش يعرفه، ولا لو الوصول ليه صعب، ولا لو سعره مش بيعكس قيمته الحقيقية. التوازن بين الجودة والسعر وسهولة الوصول هو المفتاح.

تخيّل سوق فيه طلب كبير لكن الناس مش عارفة توصل للحل بسهولة. أول ما توصلهم، تقدر تخلق سوق جديد تمامًا. شخصيًا كنت بدور على قطعة ديكور معينة، وعارف إنها ممكن تتعمل بنص التمن عند نجار. لكن أول ما لاقيتها أونلاين جاهزة — اشتريتها فورًا رغم إنها أغلى — لأن وفرت وقتي ومجهودي.

4- الخطوة الثالثة: تحديد موقعك من السوق

أول ما تلاقي الفجوة، تبقى حددت موقعك في السوق. ومن هنا بتبدأ تحدد الرسالة التسويقية الخاصة بيك.

رسالتك التسويقية هي ببساطة: “أنا بعمل كذا عشان أحل كذا للزبون الفلاني.”وكل ما جمهورك المستهدف يكون محدد أكتر، كل ما تقدر تبيع بسعر أعلى حتى لو بتقدم نفس الخدمة.

مثلًا:
- “أنا شركة تسويق بعمل سوشيال ميديا لأي حد.” (حل عام جدًا)
- “أنا شركة تسويق بعمل تسويق بالمحتوى لأي نشاط.” (أكتر تخصصًا)
- “أنا شركة تسويق بعمل تسويق بالمحتوى للمطاعم.” (حل متخصص جدًا وسهل بيعه بسعر أعلى)

لو متقدرش تملى الجملة دي: “أنا بعمل كذا عشان أحل كذا للزبون الفلاني” — فده معناه إن البيزنس بتاعك مش جاهز للتسويق.

وده مش معناه إنك لازم تبيع منتج واحد أو خدمة واحدة، بالعكس. نفس الزبون ممكن تبيعله أكتر من منتج أو خدمة لزيادة الدخل.
مثلًا لو بتشتغل في تسويق المطاعم:
- تقدر تبيع إدارة السوشيال ميديا
- تقدر تبيع أنظمة CRM
- تقدر تبيع موقع إلكتروني لتحسين نتائج البحث
- تقدر تبيع نظام تقييمات Reviews
وهكذا.

5- الخطوة الرابعة: تحديد خطة المحتوى

في المرحلة دي، لازم تبني خطة محتوى متكاملة توصل بيها جمهورك بالمحتوى المناسب. تقدر ترجع لمقالنا: ما هي خطة التسويق بالمحتوى؟ و كيف تنشئ خطة محتوى ناجحة على السوشيال ميديا.

6- الخطوة الخامسة: تحديد ميزانية الإعلانات

وأخيرًا، لازم تحدد ميزانية واقعية للإعلانات تناسب حجم السوق والنتائج اللي بتستهدفها. وده شرحناه بالتفصيل في مقالنا: كم سعر الإعلانات في مصر؟ وكيف تختار الطريقة المناسبة لنشاطك؟.

👇 تابع باقي مقالاتنا عن التسويق بالمحتوى وخطط الإعلان الذكية 👇